5 egun azoka, tradizioa eta euskal sukaldaritzaren artean
Bilbo + Gasteiz + Donostia + Zarautz + Hondarribia eta Irun
Gastronomia Euskadiko kulturaren parte da. Bizirik dago bertako merkatuetan, mostradoreetan, belaunaldiz belaunaldi transmititu diren errezetetan eta mahaia topaleku gisa ulertzeko moduan. Bertako zaporeak eta lurraldeko produktuak bihurtzen dira ibilbide honetako protagonista. Goza ezazu.
1. EGUNA: BILBO, tradizioa eta maila goreneko sukaldaritza dastatzeko hiria
Bilbo bere nortasunaren funtsezko osagaia den gastronomiaren bitartez ere gozatzen da. Bertako azokek, Erriberako Merkatua erreferente tradizional handia izanda, bertako produktuen aberastasuna ezagutzeko aukera eskaintzen dute: Kantauriko arrainak, okelak, baserriko barazkiak, kontserbak, gaztak eta txakolina. Bertako saltokien artean ibiltzea, urte-sasoiari, gertuko produktuari eta betiko errezetei –bakailaoa, marmitakoa, pistoa Bilboko erara, edo babarrunak, besteak beste– lotutako sukaldaritzara gerturatzea da.
Hiriak naturaltasun osoz uztartzen ditu betiko gastronomia eta sukaldaritza sortzaileena. Bertako taberna eta jatetxeetan pintxoak, erretegiak, otordu-etxeak, egile-proposamenak eta Michelin Izarra duten jatetxeak aurki litezke. Bizipena osatzeko, tailer gastronomikoak, dastaketak eta onenengandik ikasteko jarduerak daude, baita gozoki tipikoak dastatzeko gozotegiak ere, esate baterako, karolina, arroz-pastela edo gurin-opila.
2. EGUNA: GASTEIZ, bertako produktua eta historiadun merkataritza
Gasteizen, merkatu eta denda tradizionalak hiri-paisaiaren parte dira, batez ere Erdi Aroko Hirigunean eta Zabalgunean, han, xarma handia duten dendatxoak eta negozio historikoak elkarrekin bizi baitira.
Ehun urtetik gorako gozotegietako goxokiak, Arabako Errioxako ardoak, Arabako txakolina eta Añanako gatza dira, besteak beste, Arabara hurbiltzen laguntzen duten zaporeak, bertako tradizio gastronomikotik eta produktuetatik abiatuta.
Hiriaren erdi-erdian, Hornidura Azoka horrek lurraldeko zaporeekin eta hiriko eguneroko bizimoduarekin lotzen du bisitaria.
3. EGUNA: DONOSTIA, kalean bizi den gastronomia
Donostian, bisitarien bizipenaren parte da gastronomia. Azoka tradizionalek topagune izaten jarraitzen dute, egunetik egunera genero onena hautatzen duten ekoizle, merkatari eta sukaldaritzako profesionalentzat.
Bertako kaleetan barrena ibiltzeak hiria nazioartean ospetsu egin duen miniaturazko sukaldaritza ezagutzeko aukera ematen du, 11 jatetxeren artean banatzen diren 19 Michelin Izar batzen baititu; denda espezializatu txikietan ibiltzeko eta itsasoarekin eta sormenarekin eta berrikuntzarekin duen lotura trinkoa islatzen duten espazioetara hurbiltzeko.
4. EGUNA: ZARAUTZ, Kantauri itsasoko kresala
Kostaldeko giroak blaitzen du Zarauzko bizimodua, bertako merkataritza eta itsas tradizioa eguneroko bizimoduaren parte baitira oraindik ere. Artisautzako produktuak saltzen dituzten dendak, establezimendu txikiak, jatetxeak eta tabernak, eta itsasertzeko izozki-dendak.
Ekoizleen, ostalaritzaren eta merkataritzaren arteko hurbiltasunak lurraldeari lotutako bizipen gastronomiko bat sortzen du, itsasoko zaporeek eta hurbileko produktuek kostaldeari estuki lotutako sukaldaritza ezaugarritzen dutelako.
5. EGUNA: HONDARRIBIA, itsas tradizioa eta Kantauriko zaporeak
Hondarribian, arrantzale-tradizioak bertako kaleen izaera eta gastronomiaren ezaugarri izaten jarraitzen du. Portuaren ondoko dendatxo, terraza eta jatetxeen artean bertako produktuak lotura zuzena du itsasoarekin eta sukaldaritza jatorrenarekin.
Alde Zaharreko eta La Marina auzoko giroak Kantauri itsasoarekin uztartutako sukaldaritza tradizioa ezagutzeko gonbita egiten du, produktu freskoa, bertako jakintza eta itsas tradizioa oso presente baitaude haren baitan.
